2Cor 7 | ATA | STEP | Loxo nenge teno'u mii ane Lataua musakiinu vaikalasou ne la sou ta menexilo e eni emasaxainge misevile, menge ta'oxonu sou ta'umenenge no anu mimii ukalusi ane u'oxonu vasimenge mo uleenenge nuni'u, io nenge'a xavinexeu ane laixe xo tamama'u noxou Lataua mo taxali laixe no voxo utotomu.

a 7:52Ko 2:13

b 7:82Ko 2:4

c 7:10Mat 27:3-5; Eva 12:16-17

2 Corinthians 7

1 Loxo nenge teno'u mii ane Lataua musakiinu vaikalasou ne la sou ta menexilo e eni emasaxainge misevile, menge ta'oxonu sou ta'umenenge no anu mimii ukalusi ane u'oxonu vasimenge mo uleenenge nuni'u, io nenge'a xavinexeu ane laixe xo tamama'u noxou Lataua mo taxali laixe no voxo utotomu.

'Osa'osa Noxou Paulo

2 Ngakisii tangengi. Nexi tasusunoxu evile uasi, nexi ta'oxo masuanu evile sou utaloxo no 'a tanutanuxu noxou uasi, mo nexi ta'oxo loloxu evile sou tano'u miiumiiu uasi. 3 Eni alemolu mii ane 'o loxo sou apupuiengi uasi. Eni elemolu tei lexe masaxasinge no nano no tanexi ne umomo loxo nenge'a utotomu taxolu tapita xo mo tasoli. 4 Eni avikalangengi mo a'ume uasi. Mo a'osasinge mu'oki. Ngingi e mamaatolanenge toxoxa'a mo no anu tu'utu'umaxu mukalusi noxixe ne la 'osa'osa noxilo ne mu'oki avile.

5 ^aXo no mine nexi tene'e ne Makedonia, la vasimexe 'o ne uma'ila uasi, ia tu'utu'umaxu iouiou muxali. No paumexe la 'oto'oto no 'a vasimexe mo tanexi ne kalaua. 6 Ia Lataua anu e ulavusou umamaatolane'i ane tane'i utaloxo ne mumamaatolanexi no anu xali noxou Tito. 7 Mo loxo no anu xali noxou nesi uasi, ia anu muvikalaleli sou su'uli ane ngingi ngelosou xe ngemamaatolanu kalumo, anu mumamaatolaleli kalumo. Anu muvikalanexixu masaxa noxingesixe sou lexe ngamaisixe, mo tangengi uxoto mo tangengi ialuxu sou ngaxavutalaleli la sou 'osa'osa noxilo ne mu'oki avile. 8 ^bManina lexe eni e'oxo tangengi mutama no anu uoli voloxu noxilo ia eni taleli u'oxongenge uasi. Mo loxo eni taleli u'oxongengesou la eni emaisou lexe uoli voloxu noxilo ne mu'oxo navungenge ia anu loxo sou voxo va'utunusi. 9 Ia vaimomo 'o eni a'osa, ne tava'u loxo sou tangengi mutama ne uasi, ia tama no tangengi ne muulilaxungengi sou ngaxiu ulai noxou Lataua. Xo tama no tangengi ne anu mumulinu masaxa noxou Lataua la sou anu loxo nexi a ta'oxonu masuangengi ne uasi. 10 ^cTama no tanenge ane noxou Lataua ne sou uxalixu ulai noxou Lataua ane uulaxunenge ulai no anu pamauli mo tanenge utama la uasi, ia tama no tanenge ane sou misomisou ne lialia 'o ne uxalixu soli. 11 Ngamaisou lexe tama no tanenge ane noxou Lataua ne muxalixu mimii noxinge aloxo 'o ngavasivasinangenge no anu 'ilixo masua. Xe ngano'u la'iasou sou ngamasaxa lexe nga'oxonu 'ilixo muisalili mo la'iangengeu susu xe ngaungaunga no mine ngamaisou itema u'oxonu susu mo xavutalamengi muavuti sou nga'oxonu 'ilixo laixesi. Mo tangegni utamasi'a ta mitema ane i'oxo'oxonu 'ili'ilixo masumasua xe ngakaitolonu itema e umulinu 'ilixo mulapu uasi.

12 Mo loxo eni ekaukavunu mulai noxinge ne, anu loxo sou mitema vile ane mu'oxonu susu, mo mitema ane mususunoxu ne uasi, ia sou lexe no laaxunu Lataua la ngingi ngamomomo sou menge ngamaisinge lexe ngeitingengi ngene'e noxixe ne a loxovaa. 13 No anu mamaatola ne la, la nexi temasaxa sio sou temaisou Tito lexe mu'osa a loxovaa, xo ngingi mukalusi ne ngesu'ulinu la sou anu muxolu mu'osa. 14 Eni etoongenge noxou, xo ngapamaelaleli uasi. Ia anu aloxo mimii mukalusi ane nexi telemolu mulai noxinge ne maninasi, la sou nexi tatoongengesi noxou Tito ne mumaxa'usi lexe anu manina kalumo. 15 Mo tanungenge toxoxa'a sio no mine anu uxavutalangengi lexe ngingi ukalusi ne ngalolomu mo ngelooxu no anu 'ume xe ngetoxonu. 16 Eni a'osa lexe mumomomo sou eni aloopala pekia'u ukalusi noxinge sou ngingi nga'oxonu mii ma'ia anu Lataua umasaxau.